Sagan af Bjarna Fúskara

Ég: Rödd Jóhanns Sigurðarsonar þegar hann las fyrir Shan Yu inn á Mulan, líkami Brad Pitt upp á sitt besta.
Bjarni Fúskari: Rödd Bullwinkle úr Rocky & Bullwinkle, líkami Joe Pesci.

Ég var að yfirfara varnir heimilisins í nyrðra varnarbyrginu þegar ég varð var við umferð á hlaðinu. Andartaki seinna kom boðliði hlaupandi inn og tilkynnti mér að viðgarðarmaðurinn væri kominn. Boðliðinn var eitthvað hikandi þannig að ég spurði nánar út í aðkomumanninn. ‘Hann... hann er á Hondu Civic, herra.’ Ég spenntist upp og ískaldur hrollur skreið niður bakið á mér. Selfyssingur, hugsaði ég, þetta verður langur dagur. Boðliðinn hélt hurðinni opinni og hristi höfuðið dapur í bragði. Jæja, best að klára þetta, hugsaði ég og gekk út. Jú jú, það stóðst, á hlaðinu stóð grá Honda Civic og við hana stóð lítill þybbinn maður með aflitað hár. Áður enn hann opnaði munninn sá ég að hann hlyti að vera með óþægilega rödd.

BF: Sæll, Bjarni heiti ég. Þið eruð með bilaða tölvu hérna tísti hann eiturhress. Þetta var fullyrðing, ekki spurning.
Ég: Já. Það var nú einmitt þess vegna sem hringt var á viðgerðarmann.
BF: Jájá, það passar, er hún bara hér inni kannski eða..?
Ég: Já, sagði ég kuldalega og gekk á eftir honum inn. Um leið og hann kom inn í skrifstofuna tók hann andköf.
BF: Jahá? Hér hefur verið nóg að gera. Hann átti við opna tölvukassana og íhlutina sem lágu um allt.
Ég: Já, ég var að reyna að útiloka vélbúnaðarvandræð-
BF: Uss, það er aldrei hægt að útiloka vandræði, þú veist hvað á ég við? greip hann fram í og sparkaði í einn kassann.
Ég: Já, sagði ég þó ég hefði ekki nokkurn vott af hugmynd um hvað hann meinti.
BF: Ha?
Ég: Já.
BF: Ha?
Ég: Já. Ég veit hvað þú átt við, sagði ég á hraða sem ég hélt að Selfyssingur ætti að meðtaka.
BF: Jájá, er þetta tölvan? Hann benti á tölvuna sem var greinilega hvað heillegust og ennþá greinilegar sú eina sem var tengd.
Ég: Já, andvarpaði ég og velti því fyrir mér í hverju ég væri lentur.
Hann byrjaði svo á því að reyna kveikja á tölvunni en það hafði þveröfug áhrif þar sem það hafði verið kveikt á henni fyrir. Hann kveikti á henni aftur og eftir að hafa fiktað í engu sem ég sá að skipti máli slökkti hann og fiktaði því næst í tölvukassanum sjálfum. Þar reyndi hann til að mynda að tengja Ata kapal í floppy drifið með þeirri meiningu að drifið væri harður diskur. Hann lagði því næst til að við nýttum eitthvað af vinnsluminninu úr annari gömlu tölvunni og hefði sjálfsagt reynt að troða því í minnisraufarnar á virku tölvunni ef ég hefði ekki ítrekað sagt honum að kortin og þar með raufarnar væru gjörólíkar milli tölva. Með minni hjálp tengdi hann harðan disk sem ég átti í tölvuna, kveikti á henni og fór í biosið þar sem hann eyddi heilmiklum tíma í að stilla klukkuna og skoða hluti eins og Pci tengingar sem er nokkuð skrýtið í ljósi þess að Pci raufarnar voru ekki í notkun (fyrir utan eina sem geymdi hljóðkortið) heldur Isa og Agp raufarnar. Hann fékk sér svo sígarettu og reif og tætti stundur og saman í tölvukassanum á meðan tölvan var í gangi og var rétt búinn að skemma móðurborðstengingar með öfugum eða vitlausum ísetningartilraunum. Ég bað hann að hafa mig afsakaðan, náði í kjötsax og myrti Bjarna viðgerðarmann svo með köldu blóði.

Endir

Þetta er ekki alveg nákvæmt. Hann var á Hondu Acura en ekki Civic. Og ég drap hann ekki, já, en mikið langaði mig það. Hann náði loks að koma kerfinu í lag en það var með herkjum. Ég vona að ég þurfi aldrei að sjá þennan mann framar því þá neyðist ég til að setja eitthvað þungt framan í hann.

tack tack

--Drekafluga, venting--

Tölvunördinn ég

Þetta er ekki bara nafn á dálki sem ég setti hér til hliðar fyrir nokkru. Þetta er líka satt. Ástæða þess (í þetta skiptið) að ég hef ekki vefritað neitt síðan síðast... (stutt hugsanapása) er sú að ég varð að nota varahlut úr þessari tölvu til að geta sett saman heimatilbúna scrapheap tölvu úti í fjósi. Fjóstölvan tók upp á því að frjósa í tíma og ótíma án nokkurrar sýnilegrar skýringar og hafði það þær afleiðingar að ég hef fundið hina fullkomnu aðferð til að verða snar fucking geðveikur. Það er ekkert grín að þurfa að vinna með bæði svona gamlan vélbúnað og hugbúnað. Þrjár tölvur voru tættar í sundur og settar saman í þá sem var yngst og því meðfærilegust. Ég var með nýjan harðan disk, setti forritið upp aftur, keyrði inn backupið af öllum gögnunum, opnaði forritið, fékk slag þegar tölvan fraus og stökk út um gluggann með þeirri von að einhver hefði grafið síki þar fyrir neðan. Ég er búinn að reyna allt á þetta hevíti en ekkert gengur. Nú í dag ætlar tölvugerpið frá MBF að koma og kíkja á þetta og ég ætla að nota tækifærið til að sparka í sköflunginn á honum. Fast.


...

...

tack tack

--Drekafluga--

Lítil vefritun, mikil vinna...

Ég ætlaði t.d. að vera löngu búinn að koma þessari vísu upp, ásamt myndinni. Svo telst það líka til gleðitíðinda að ég fann spólu með nokkrum Roar þáttum. Þetta var uppáhalds sjónvarpsefni mitt á sínum tíma. Man einhver eftir þessu? Heath Ledger var þarna í aðalhlutverki sem keltneskur stríðsmaður og barðist ásamt félögum sínum gegn Rómverjum. Magnað svalir þættir. En þetta gengur ekki. Ég er farinn að vinna.



Fellur vel á velli
verkið karli sterkum,
syngur enn á engi
eggjuð spýk og rýkur
grasið grænt á mosa,
grundin þýtur undir
blómin bíða dóminn,
bítur ljár í skára.

(Jónas Hallgrímsson)


tack tack

--Drekafluga, með typpi (út frá umræðum við síðustu færslu)--

Ég er ekki með frjóofnæmi

Annars væri ég dauður. Í dag kom ég aftur frá Laugarvatni þar sem ég hafði verið frá miðjum degi í gær hjá henni Gunnþóru minni. Síðan hef ég verið í gróðurvinnu. Ég sló garðinn og er svo langt kominn í kring um garðflötina með ofursláttuorfi. Grasfrjóið var oft eins og reykur þegar ég tætti í gegn um stráin. Eftir þetta, og margt annað í millitíðinni, sagaði ég niður nokkrar stóreflis trjágreinar og eitt tré og til að gera eitthvað úr þeim fór með allt saman upp í Skútás sem er falleg hæð hér rétt hjá. Ég ætla nefnilega að girða af land og rækta upp með trjám. Ég get varla lýst hversu frábært mér finnst að búa í sveit. Ég get til dæmis bara gert eitthvað svona. Valið mér fallegt landsvæði (og af því er nóg hér um slóðir þó ég segi sjálfur frá) og spurt mömmu og pabba hvort ég megi slá eign minni á það. Þetta verður svona sælureitur og bústaðarland í framtíðinni. Reyndar leyfi ég móðursystur minni að velja sér land fyrst svo það getur vel farið svo að ég verði af þessu en ég hef fleiri staði í huga. Yfir og út.

tack tack

--Drekafluga skógræktandi og landeigandi--

Já...

Ég er þreyttur og nenni ekki að skrifa mikið en verð bara að segja frá því að tónleikarnir voru prýðisskemmtun. Mér fannst skemmtilegra á Foo Fighters tónleikunum því Foo Fighters skemmtu sér sjálfir einfaldlega miklu betur en þetta var stuð. Stuðið byrjaði reyndar eiginlega ekki fyrr en Nothing Else Matters, Master of Puppets, One og fleiri ofurlög fóru að heyrast undir seinni hluta tónleikanna. Bassasólóið hjá Robert Trujillo var líka ótrúlegt og mér fannst hann svalastur á sviðinu. Ég fékk gæsahúð. Annars er hálf skrýtið frá því að segja en ég held ég hafi sungið meira með Mínus en Metallica. Ég bara kunni meira með þeim. Athyglivert. En ég er farinn í pottinn. Ekkert rugl.

Já, alveg rétt. Stórt ‘yay’ fær Rúv fyrir að sýna aðra seríu af einum fyndnustu þáttum Englands, My Family. Yay!

tack tack

--Drekafluga girðingarmaður--

Mínus, Brain Police & Metallica

...

Það er ekki slæm leið til að eyða einni kvöldstund.


tack tack

--Drekafluga--

Ég hef ekki Ögmund...

Hæstvirtur (mér finnst þetta alltaf svo fyndið. Svo geta komið einhverjar svívirðingar um viðkomandi en það er allt í gúddí af því að ræðumaður sagði ‘hæstvirtur’) þrettándi þingmaður Reykjavíkur, Ögmundur Jónasson setti réttilega út á Morgunblaðið og Sjálfstæðisflokkinn og kvað báða hafa dregið umræðu um forsetakosningar niður í svaðið. Réttilega? Já. Vel? Nei. En ég ætla ekki að tala um það þar sem þetta átti rétt á sér. Hinsvegar fór hann að setja út á forsetaembættið og þá sýn sem Ólafur Ragnar hefði á það. Ögmundi fannst forsetinn ekki eiga að vera svo mikill valdhafi sem Ólafur vildi heldur sameiningartákn þjóðarinnar. Ögmundi fannst forsetinn líka hafa gert of mikið af því sem hann nefnir kónga- og auðmannadekur og vildi ekki sjá slíkt. Og á forsetinn þá ekki að taka á móti erlendum þjóðhöfðingjum?

Ögmundur minn, hvern fjandann viltu þá að forsetinn geri? Sitji heima á Bessastöðum og klóri sér í rassinum? Jú, og strjúki Dorrit sinni öðru hvoru? "...Með hófsemi og yfirvegun getur hann haft áhrif – en á allt annan hátt en með þeirri aðkomu sem nú er boðuð..." Og það mundi hann gera með því að hósta lágt og segja "A.. a- afsakið. Má þetta?"

Ögmundur minn, yfirleitt hefur mér fundist þú vera skýr náungi. Hvað er svo þetta? En þetta eru allt of margar spurningar. Varð bara að koma frá mér að víða leynast misjöfn rök, jafnvel í manns eigin flokki.

tack tack

--Drekafluga pólitíski--